Rapua he āwhina.

Ko te takiurunga RealMe ko tētahi ingoa kaiwhakamahi me te kupuhipa ka whakamahia e koe e uru tuihono ai koe ki ngā ratonga kāwanatanga o Aotearoa. He mea ahurei ki a koe, ā, kāore ō taipitopito whaiaro e tiria. Ko koe anake e taea ana te kite i te wāhi me te wā i whakamahia ai.

Ko te tuakiri kua manatokona e RealMe ko tētahi tuakiri matihiko i tukuna e te Kāwanatanga e honoa ana ki tō takiurunga RealMe. Tukua ai koe ki te hāpono i tō tuakiri i te ipurangi ki ngā ratonga e whai wāhi mai ana, mā te whakaū i ngā taipitopito whaiaro matua – pērā i tō ingoa, i tō ira tangata, i tō rā whānau hoki. I roto rā hoki tētahi whakaahua mōu. Ina whakamahi tuihono koe i tō tuakiri kua manatokona, me mātua whakaae koe ki te tiri i ō taipitopito. Ko te tikanga o tēnei kei a koe te mana whakahaere mō ō pārongo whaiaro.

I mua i tō tono i tō tuakiri kua manatokona, tirohia e kite ai koe mēnā rānei e hiahiatia ana tētahi. Mēnā e mea ana tētahi ratonga "takiuru mai ki RealMe", tērā pea ka hiahia anake koe ki tētahi takiurunga RealMe – kaua ko te tuakiri kua manatokona. Hei tauira, kāore koe i te hiahia ki tētahi tuakiri kua manatokona hei tono i tētahi uruwhenua o Aotearoa, i tētahi kōkota o Aotearoa rānei ki Immigration New Zealand.

Ngā wāhi hei whakamahi i a RealMe

Ko te huarahi tino māmā ki te hihira ko te takiuru ki tō pūkete RealMe i realme.govt.nz. Mena kei te kīia kāore anō kia manatokona tō pūkete, kāore ōu tuakiri kua manatokona e RealMe.

Oti ana tō tuku i tō tono i tētahi tuakiri kua manatokona e RealMe (ā-tuihono, i tētahi toa hoa patui rānei) ka tāria tā mātou whakahoki kōrero ki a koe i roto tonu i te 5 rā mahi. Ka īmēra mātou ki a koe mēnā e hiahia ana mātou ki ētahi atu pārongo, ā, hei whakaū hoki kua whakaaetia tō tuakiri kua manatokona.

Takiuru ki tō pūkete RealMe, ka tirohia ngā taipitopito i roto i te wāhanga Tō Tuakiri. Hei whakahou i tō ingoa, i tō ira tangata rānei, tīpakohia Whakahaeretia tō tuakiri. Mēnā e hē ana ō taipitopito, tēnā whakapā mai ki a mātou.

Whakapā mai

Mēnā kāore koe i Aotearoa ka taea tonutia e koe te waihanga i tētahi takiurunga RealMe (he ingoa kaiwhakamahi me te kupuhipa) me te homai i tētahi tau waea ki tāwāhi mō ō taipitopito whakapā. He mea āwhina te hono i tētahi taupānga motuhēhē ina hangaia e koe tō < b>takiurunga RealMe mēnā kei tāwāhi koe, ā, kāore e taea te whiwhi waehere mā te pātuhi.

Ahakoa ka taea te tono i tētahi tuakiri kua manatokona e RealMe i waho o Aotearoa, he iti noa ngā ratonga RealMe e wātea ana ki te hunga e noho ana i tāwāhi, nō reira, kāore pea koe e hiahia ki tētahi. Hei tauira, kāore koe i te hiahia ki tētahi tuakiri kua manatokona hei tono i tētahi uruwhenua o Aotearoa, i tētahi kōkota o Aotearoa rānei ki Immigration New Zealand.

Ki te kore koe e hiahia ana ki tētahi tuakiri kua manatokona e RealMe i tēnei wā tonu, taihoa kia hoki rā anō koe ki Aotearoa.

Hei tono, hei whakahou rānei i tō tuakiri kua manatokona i a koe e noho ana i tāwāhi, me āhei koe ki te hopu tuihono i tō whakaahua mā te whakamahi i tō pūrere. Tērā pea me homai hoki e koe tētahi kaitaunaki tuakiri.

Ka taea anake e mātou te tuku i te tuakiri kua manatokona ki ngā pārongo e ōrite ana ki tētahi mauhanga pūtake whai mana pēnei i te uruwhenua o Aotearoa, i te kirirarautanga, i te mauhanga whānautanga, i te mauhanga hekenga rānei.

Ki te tono koe mā te whakamahi i tō uruwhenua o Aotearoa, i ō taipitopito kirirarautanga rānei, ka tukua tonutia tō ira tangata i te uruwhenua, i te mauhanga kirirarautanga rānei.

Ki te whakamahi koe i tētahi tiwhikete whānau o Aotearoa, i tētahi mauhanga hekenga rānei, me whakauru e koe tō ira tangata hei tāne, hei wahine, hei tāhūrua-kore rānei. Ka hihiratia ā-ringahia tēnei ki te mauhanga e tā mātou rōpū tukatuka.

Mēnā kua wareware i a koe tō kupuhipa, whakamahia te hono "kua wareware te kupuhipa (forgot password)" i te whārangi takiuru a RealMe.

Me tāuru e koe tō ingoa kaiwhakamahi me tētahi wāhitau īmēra e hāngai ana ki taua ingoa kaiwhakamahi. Hei ara kē, ka taea te pāwhiri i te "Whakahou kupuhipa mā te pātuhi kē (Reset password by TXT instead)" ka tāuru i tō ingoa kaiwhakamahi me te tau waea pūkoro e hāngai ana.

Kātahi ka pāwhiri i te pātene "Tuku waehere (Send code)". Ka tukuna atu he waehere e ono ngā mati ki a koe mā te īmēra, mā te pātuhi rānei. Tāurua te waehere mai i te īmēra, i te pātuhi rānei ki te āpure whakaū waehere, ka pāwhiri i te pātene "Whakaū waehere (Confirm code)". Kātahi ka taea e koe te tāuru i tētahi kupuhipa hou, te whakaū i taua kupuhipa mā te tāuru anō, kātahi ka pāwhiri i te pātene "whakahou kupuhipa (reset password)".

Mēnā kua wareware i a koe tō ingoa kaiwhakamahi, whakamahia te hono "kua wareware te ingoa kaiwhakamahi (forgot username)" i te whārangi takiuru a RealMe.

Me tāuru e koe tētahi wāhitau īmēra e honoa ana ki tō ingoa kaiwhakamahi. Hei ara kē, ka taea te pāwhiri i te "Whiwhi ingoa kaiwhakamahi mā te pātuhi kē (Get username by TXT instead)", ka tāuru i tētahi tau waea pūkoro.

Pāwhiritia te pātene "Tuku waehere (Send code)". Ka tukuna atu he waehere e ono ngā mati ki a koe mā te īmēra, mā te pātuhi rānei. Tāurua te waehere mai i te īmēra, i te pātuhi rānei ki te āpure whakaū waehere, ka pāwhiri i te pātene "Whakaū waehere (Confirm code)". Ka whiwhi koe i tētahi īmēra e whakamōhio ana i tō ingoa kaiwhakamahi ki a koe.

Hei panoni i tō ingoa i tō tuakiri kua manatokona, me kōrero mai koe ki a mātou:

• ō taipitopito ingoa hou
• i pēhea tō mana ki te ingoa hou (hei tauira, nā te marena, nā te mea rānei kua whakarerekētia tō ingoa mā te whakapuakitanga ā-ture, mā te pānuitanga whānui (deed poll) rānei)
• ngā taipitopito i te tuhinga (mō ngā tiwhikete mārena me te hononga ā-ture i roto rā tō ingoa o mua)
• te rā i panonitia ai
• mēnā rānei i rēhitatia te panonitanga i Aotearoa, i tāwāhi rānei.

Me tuku mai e koe he tuhinga hei taunakitanga mēnā:

• i whakarerekē koe i tō ingoa i tāwāhi, i mārenatia rānei koe i tāwāhi, tērā rānei,
• i whānau koe ki tāwāhi, ā, i hurihia tō ingoa i Aotearoa i mua i te 25 o Hānuere 2009.

Hei whakahou i tō ingoa, takiuru ki tō pūkete RealMe, kātahi ka tīpako i Whakahaeretia tō tuakiri.

Ka taea anake te tuku i tētahi tuakiri kua manatokona i roto i te ira tangata e ōrite ana ki tētahi pūtake whai mana. Kei roto pea i tēnei ki tō mauhanga whānautanga o Aotearoa, tō uruwhenua o Aotearoa, tō kirirarautanga o Aotearoa, tō mauhanga hekenga o Aotearoa rānei.

Ki te hiahia koe kia rerekē te ira tangata i tō tuakiri kua manatokona i te ira tangata i tētahi o aua mauhanga, me tuku mai koe i tētahi tuhinga e whakaaetia ana hei tautoko i tō ira tangata kua tonoa. Tērā pea he uruwhenua o tāwāhi tēnei, he ōta ā-kōti o Aotearoa i mua i te tau 2023, he tiwhikete ehara i te taunakitanga rānei nō te tari kirirarautanga o Aotearoa rānei.

Hei panoni i tō ira tangata ki tō tuakiri kua manatokona, me kōrero mai koe ki a mātou:

• tō ira tangata hou
• te wāhi i mauhangatia ai tō ira tangata hou.

Hei whakahou i tō tuakiri, takiuru ki tō pūkete RealMe, kātahi ka tīpako i Whakahaeretia tō tuakiri.

Mēnā i whānau koe ki Aotearoa, ā, kua tono koe kia hurihia te ira tangata kua rēhitatia ki Whānautanga, Matenga, Mārenatanga (Births, Deaths and Marriages), ka whakahoutia aunoatia tō tuakiri kua manatokona hei wāhanga o tēnei tukanga.

Hei panoni i ō taipitopito takiuru, haere ki te whārangi kāinga a RealMe, ka pāwhiri i te "Takiuru (Log in)". Ka takiuru, ka pāwhiri i te ripa "Ngā Tautuhinga (Settings)", kātahi ka tīpako i te mea e hiahia ana koe ki te panoni mai i te tahua.

Ko ētahi o ngā kōwhiringa ka herea koe ki te tāuru anō i tō kupuhipa, i tētahi waehere takiuru tukarua hoki. Ka tukua tēnei ki a koe mā te pātuhi, ka wātea rānei mā te taupānga Authenticator mēnā kua tatūria tēnei kōwhiringa e koe.

Ina rēhitatia tō waea pūkoro ki te whiwhi i ngā waehere tukarua, tē taea te muku mā te ratonga-whaiaro. Waea mai ki a mātou ki 0800 664 774 (tērā rānei ki +64 4 462 0674 mai i tāwāhi).

Ka taea e koe te whakatārewa i tō pūkete RealMe i ngā wā katoa kia kore ai e taea te whakamahi i tō takiurunga RealMe.

Hei whakatārewa i tō pūkete, waea mai ki a mātou ki 0800 664 774 (tērā rānei ki +64 4 462 0674 mai i tāwāhi). Ka taea e koe te whakahohe anō i muri mai.

Hei whakakore i tō tuakiri kua manatokona e RealMe, takiuru atu ki tō pūkete RealMe. I te whārangi Nau mai ki RealMe, tīpakohia Whakahaeretia tō tuakiri.

Mēnā kua mōnehu tō tuakiri kua manatokona e RealMe i roto tonu i te 90 rā e heke mai ana, tē taea te whakakore.

E mana ana ngā tuakiri kua manatokona e RealMe mō:

• te 5 tau mēnā i tukuna i mua i te 5 o Hānuere 2023
• te 10 tau mēnā i tukuna i te 5 o Hānuere 2023, i muri mai rānei.

Me whiwhi koe i tētahi īmēra whakamaumahara i mua i te mōnehu o tō tuakiri kua manatokona.

Ki te kore koe e whakahou tonu, ka taea tonu e koe te whakamahi i tō takiurunga RealMe ki ētahi atu ratonga kāore e hiahiatia ana te tuakiri kua manatokona, me te whakamahi tonu i ngā ratonga kua tukua kētia e koe tō tuakiri kua manatokona ki a rātou.

Mā te ratonga RealMe e āhei ai koe ki te manatoko i tō wāhi noho mā te New Zealand Post Address Verification Service.

Hei manatoko i tō wāhi noho, whāia ēnei hipanga ngāwari:

• Haere ki te Whārangi Kāinga a RealMe
• Pāwhiritia te pātene "Takiuru (Log in)" i te kokonga matau o runga o te whārangi
• Tāurua tō ingoa kaiwhakamahi me tō kupuhipa
• Whakaotingia te hihira Haumarutanga mā te tāuru i te waehere RealMe e 6 ngā mati mai i tō pūrere
• I te wāhanga "Tō Wāhi Noho (Your address)" pāwhiritia a "Manatokona taku wāhi noho (Verify my address)", kātahi ka whai i ngā tohuāki.

He ngāwari te āhua o te mahi:

1. Tāpirihia tō wāhi noho i te kāinga. Tāuru tuihonotia noa te wāhi noho o tō wāhi noho matua (tō wāhi noho kāinga matua) i te New Zealand Post Address Verification Service, kōwhiria rānei tō wāhi noho matua i te Address Verification Service kua tukuna kētia e koe taua wāhi noho ki a New Zealand Post (hei tauira, i tō rēhita ki te whakamahi i ngā ratonga tuihono o New Zealand Post, tērā rānei i tō whakamahi i te ratonga "Manage My Addresses"). Me tāpiri hoki koe i te roanga o tō ingoa, i tō rā whānau hoki.
2. Kātahi ka ngana te pūnaha ki te tūhono i ō taipitopito ki ngā puna raraunga tuihono e whirinakihia ana. Ki te kitea tētahi tūhononga, ka manatokona tō wāhi noho i taua wā tonu.
3. Ki te kore he tūhononga, ka tuku ā-tinana a New Zealand Post i tētahi waehere manatoko ki te wāhi noho i tīpakohia e koe. Ka rima ki te whitu ngā rā pakihi e tae atu ai ki a koe.
4. Tāurua tō waehere. Ina tae atu tō waehere, haere noa ki te whārangi kāinga a RealMe, takiuru atu ki ō taipitopito kua manatokona e RealMe, ka tāuru ai ki te āpure i whakaritea.

Kia mōhio mai koe, ko ngā wāhi noho ā-kāinga anake o Aotearoa ka taea te manatoko hei whakamahinga ki a RealMe. Tē taea e koe te manatoko i tētahi wāhi noho i tāwāhi, i tētahi pouaka poutāpeta, i tētahi Pouaka Motuhake rānei hei whakamahinga ki RealMe.

Hei whakahou i tō wāhi noho kua manatokona ki a RealMe, whāia ēnei hipanga:

• Haere ki te whārangi kāinga a RealMe, ka pāwhiri i Takiuru (Log in)
• I raro i te wāhanga "Tō Wāhi Noho (Your address)", tīpakona a "WHAKAHOUNGIA TŌ WĀHI NOHO (UPDATE YOUR ADDRESS)"
• Oti ana te whakawhiti atu i a koe ki te New Zealand Post Verification Service, tīpakohia te kōwhiringa "TĀPIRIHIA TŌ WĀHI NOHO KĀINGA (ADD YOUR HOME ADDRESS)".

Ka taea anake tō wāhi noho matua (tō wāhi noho kāinga matua) te manatoko mō RealMe. Tē taea e koe te whakamahi i tētahi Pouaka Poutāpeta, i te wāhi noho taupua, i te wāhi noho ehara i te wāhi e nohoia ana rānei ki a RealMe.

Pūrongotia te tinihanga e whakapaetia ana mā te whakamahi i tā mātou puka uiui tuihono, ka tīpako i "ngā take haumarutanga, tūmataiti rānei (security or privacy concerns)" hei kaupapa

Mēnā e ākina ana koe ki te tāuru i tētahi waehere motuhēhē, e pēnei ana nā te mea kua rēhitatia e koe i mua tētahi taupānga motuhēhē i tō pūkete RealMe. Mēnā kua kore i a koe te pūrere me te taupānga motuhēhē, waea atu ki te taupaepae āwhina ki 0800 664 774. Mā mātou koe e āwhina ki te whakatika.

Ki te pāngia koe e ngā raru pūtirotiro, ka taea te whakamātau ki te ūkui i te keteroki a tō pūtirotiro, i ngā pihikete hoki.

Google Chrome

Safari - iPhone, iPad, iPod touch rānei

Safari - Mac

Ina takiuru ana ki RealMe, ki te whiwhi whakatūpato koe e mea ana "He raru kei te tiwhikete haumarutanga o tēnei pae tukutuku (There is a problem with this website's security certificate)", kia mōhio mai koe e whakahoungia tonutia ana i ngā wā katoa ngā tiwhikete haumarutanga a RealMe. Tērā pea he pūtirotiro, he rorohiko, he tautuhinga whatunga rānei te raru.

E tūtohu ana mātou kia whakaotingia tētahi rapunga tuihono mō tāu ake pūrere, pūtirotiro, pūnaha whakahaere hoki e kite rongoā ai.

Ko ētahi o ngā rongoā noa ko te hihira e tika ana ngā tautuhinga wā, ngā tautuhinga rā hoki o tō whatunga, te ūkui rānei i te keteroki a tō pūtirotiro.

Whakaritea e whakatutukihia ana ēnei whakaritenga pūnaha e tō pūrere:

Ngā pūrere hototahi

iPhone/iPad (iOS):

• iOS 26
• iOS 18

Mac (macOS):

• 26 Tahoe
• 15 Sequoia

Android:

• 16.0
• 15.0

Windows:

• 11.0
• 10.0

Waea pūkoro Windows:

• 10.0
• 8.1

Ngā pūtirotiro kei te tautokona

Chrome 143 me te 144

Safari 18 me te 26

Edge 143 me te 144

Mēnā kei te waihanga koe i tētahi takiurunga RealMe (te ingoa kaiwhakamahi me te kupuhipa) mai i tāwāhi, ā, kei te raruraru koe ki te tāuru i tō tau waea pūkoro, kia mōhio mai koe ka taea anake te tāpiri i tētahi tau waea pūkoro o Aotearoa, o Ahitereiria rānei. He āpure kōwhiri tēnei nā reira e pai ana te waiho kia noho wātea.

Mēnā kei te tāuru koe i tō Tau waea whakapā kē (Alternative contact number) e pai ana tēnei ahakoa nō hea. Mēnā kei te raruraru koe ki te tāuru i tētahi tau waea o tāwāhi, whakamātauhia te waiho i te 0 i te tīmatanga o tō tau ina tāuru koe i te "Tau Kūmua (Prefix)".

Hei tauira, mēnā kei Peretānia koe, tīpakohia te Waehere whenua UK (+44), kātahi ka tāuru i te waehere rohe horekau te 0, kia 4 noa iho ngā mati mō te tau kūmua (prefix).

Ka tonoa pea ētahi kiritaki whai tau waea pūkoro o Ahitereiria kia rēhita i tētahi Taupānga Motuhēhē ina takiuru rātou ki RealMe. Mā konei pea e aukatingia ai tō whakamahi i tō tau waea pūkoro hei whakaoti i te motuhēhēnga tukarua. Engari kē, ka tohuākina koe ki te tāpiri i tētahi Taupānga Motuhēhē. He tukanga ngāwari tēnei, mō ētahi atu pārongo torohia te wāhanga 'Ngā taupānga motuhēhē (Authenticator apps)' i raro i te 'Tāpiri haumarutanga atu anō (Add extra security)'.

Hihiratia te tika o tō tāuru i ō taipitopito wāhi noho.

Mēnā e ōrite tika ana te wāhi noho e whakaaturia ana ki tōu wāhi noho ake, tonoa tētahi reta manatoko hou mā te:

• Haere ki te whārangi kāinga a RealMe, ka pāwhiri i Takiuru (Log in)
• I raro i "Tō Wāhi Noho (Your Address)", tīpakona a "Whakahoungia tō wāhi noho (Update your address)"
• Oti ana tō whakawhiti atu ki te New Zealand Post Address Verification Service, pāwhiritia te pātene "Request New Code".

Kia mōhio mai koe mēnā ka tae atu te reta tūturu i muri i tō tono i tētahi reta manatoko hou, kua kore te PIN e whakaaturia ana i te reta tūturu e whai mana. Tuhia te rā i tono koe i tō waehere manatoko hou, kia tāuru anake koe i te waehere tino hou.

Ko te PIN muna koia te waehere 5-mati ka taea te whakamahi, ka mahue ko ngā pātai haumarutanga hei whakahou tuihono i tō kupuhipa.

Whakatatūria tētahi PIN muna mā te haere ki te whārangi kāinga a RealMe me te pāwhiri i "Takiuru (Log in)". Ka takiuru, ka pāwhiri i te ripa "Ngā Tautuhinga (Settings)", kātahi ka tīpako i te tahua ko "Tāpiri PIN muna (Add secret PIN)".

Me 5 ngā mati o tō tau PIN, ā, kāore e whakaaetia kia ōrite ngā tau e toru, kia neke atu i ngā tau piri tata e toru rānei.

Ina takiuru koe ki tētahi ratonga e hiahiatia ana te haumarutanga nui ake, ka tono mātou ki a koe mō te "motuhēhēnga tukarua (second-factor authentication)". Ko te hono i tētahi taupānga Motuhēhē ki tō pūkete RealMe, koia tētahi huarahi hei tuku i taua haumarutanga tāpiri.

Tīwhiri: He rawe ngā taupānga Motuhēhē mēnā kei tāwāhi koe, ā, tē taea te whiwhi waehere mā te pātuhi.

Te whakarite i te motuhēhēnga tukarua

I tō takiurunga tuatahi atu ki tētahi ratonga e hiahiatia ai te haumarutanga tāpiri, mā mātou koe e tohuāki ki te whakatatū i te motuhēhēnga tukarua mā te pātuhi, mā tō Taupānga Motuhēhē rānei.(Mēnā kāore ō waea pūkoro ka taea te tikiake i tētahi taupānga papamahi hototahi, i tētahi toronga pūtirotiro rānei he mea Time-based One Time Password (TOTP).

Hei whakamahi i tētahi taupānga Motuhēhē, whakaotia ngā hipanga e whai ake nei:

• Me mātua whakarite kua tāutatia tētahi Taupānga Motuhēhē ki tō pūrere.
• Whakatuwheratia tō Taupānga Motuhēhē, ka pāwhiri i te ata 'tāpiri' hei tāpiri i tētahi waehere hou, kātahi ka:
• Kōwhiri ki te "Matawai i tētahi waehere QR (Scan a QR code)"
• Matawaia te waehere QR RealMe
• Tāurua te waehere 6-mati e whakaaturia ana i tō Taupānga Motuhēhē ki te āpure "Waehere Whakaū (Confirmation Code)" o RealMe, kātahi ka pāwhiri i te pātene "Whakaū Waehere (Confirm Code)".

Tīwhiri: Ki te kore ngā Taupānga Motuhēhē i tāutatia i tō pūrere, ka taea tētahi te tikiake. E tūtohu ana mātou i te Google Authenticator e wātea mai ana i te App Store (Apple), i te Play Store (Android) rānei.

Ināianei kua taea tō whakamahi i tō Taupānga Motuhēhē hei takiuru ki tētahi ratonga e hiahiatia ana te haumarutanga tāpiri ina tohuākina koe mō te "motuhēhēnga tukarua" - ka whakatuwhera noa i tō taupānga Motuhēhē, ka tāuru i te waehere e whakaaturia ana mō RealMe.

Tē taea te matawai i te waehere QR, me pēhea?

Whakamātauhia te pāwhiri i te hono i te mata i raro i te waehere QR "Tē taea te matawai i te waehere QR? (Unable to scan the QR code?) Pāwhiri ki konei. (Click here)"

Hei ara kē, ka taea tō rēhitatanga te whakatatū ā-ringa. Whakatuwheratia tō Taupānga Motuhēhē, ka pāwhiri i te ata 'tāpiri (plus)' hei tāpiri i tētahi waehere hou, kātahi mō:

Google Authenticator

• Kōwhiritia kia "Tāuru i tētahi kī whakatatū (Enter a setup key)", ka tāuru i ngā taipitopito e whai ake nei:

Ingoa pūkete: RealMe

Tō kī: Tāurua te kī e whakaaturia ana i te mata

Momo kī: E hāngai ana ki te wā (Time based)

• Pāwhiritia te 'Tāpiri (Add)'.

I ngana ahau ki te whakamahi i te hono ā-mata engari kāore i te whai hua mōku.

Me mātua tāuta tētahi Taupānga Motuhēhē ki tō pūrere e whai hua ai te hono.

Mēnā kei te whakamahi koe i tētahi pūrere Apple, ka whakarewatia pea tōna Apple Password Manager. Ki te pēnei, whakatatūria ā-ringahia tō rēhitatanga e ai ki ngā tohutohu i te wāhanga o runga.

Kei a au kē te PĀTUHI "motuhēhēnga tukarua (two factor authentication)", ka taea e au te tāpiri i tētahi Taupānga Motuhēhē?

Āe, ka taea, me whai noa i ngā hipanga i raro nei.

• Me mātua whakarite kua tāutatia tētahi Taupānga Motuhēhē ki tō pūrere. Ki te kore ngā Taupānga Motuhēhē i tāutatia i tō pūrere, ka taea tētahi te tikiake. He utukore te whakamahi i ngā taupānga Motuhēhē. E tūtohu ana mātou i te Google Authenticator e wātea mai ana i te App Store (Apple), i te Play Store (Android) rānei.
• Haere ki te whārangi kāinga a RealMe page, ka takiuru (log in).
• Pāwhiritia te ripa Ngā Tautuhinga (Settings).
• Mai i te tahua, tīpakohia 'Panonitia tō Taupānga Motuhēhē (Change your Authenticator App)'.
• Whakatuwheratia tō Taupānga Motuhēhē, ka pāwhiri i te ata 'tāpiri (plus)' hei tāpiri i tētahi waehere hou, kātahi mō:

Google Authenticator, ka kōwhiri ki te 'Matawai i tētahi waehere QR'

• Matawaitia te waehere QR RealMe.
• Tāurua te waehere 6-mati e whakaaturia ana i tō Taupānga Motuhēhē ki te āpure "Whakaū Waehere (Confirmation Code)" o RealMe, kātahi ka pāwhiri i te pātene 'Tiaki panonitanga (Save changes)' i te taha whakarunga o te taha matau o te mata.

Ināianei kua taea tō whakamahi i tō Taupānga Motuhēhē, i te pātuhi rānei hei takiuru ki tētahi ratonga e hiahiatia ana te haumarutanga tāpiri ina tohuākina koe ki te "motuhēhēnga tukarua (second-factor authentication)" - ka whakatuwhera noa i tō taupānga Motuhēhē, ka tāuru i te waehere e whakaaturia ana mō RealMe.