He aha tēnei mea te tuakiri kua manatokona e RealMe?
Ko te tuakiri kua manatokona e RealMe ko tētahi tuakiri matihiko i tukuna e te kāwanatanga o Aotearoa e honoa ana ki tō takiurunga RealMe.
Tukua ai koe ki te hāpono i tō tuakiri i te ipurangi ki ngā ratonga e whai wāhi mai ana, mā te whakaū i ngā taipitopito whaiaro matua – pērā i tō ingoa, i tō ira tangata, i tō rā whānau hoki. I roto rā hoki tētahi whakaahua mōu.
He utukore te tono. Tokomaha ngā tāngata e āhei ana te whakaoti ā-tuihono i te tono, heoi, ki te kore e taea e koe me toro atu koe ki tētahi toa hoa patui a RealMe hei whakaatu i ō tuhinga, e hopungia ai tō whakaahua.
10 tau te roa o te mana o ngā tuakiri kua manatokona e RealMe.
Te manatoko i tō wāhi noho
E herea ana e ētahi ratonga kia manatokona hoki tō wāhi noho. Mena kāore anō tō wāhi noho kia manatokona i roto i tō pūkete RealMe, ka tono pea taua ratonga kia whakaūngia e koe mā tētahi atu ara.
I mua i tō tono
I mua i tō tono i tētahi tuakiri kua manatokona, tirohia mēnā e hiahiatia ana tētahi. Mēnā e mea ana tētahi ratonga 'takiuru mai ki RealMe', tērā pea ka hiahia anake koe ki tētahi takiurunga RealMe – kaua ko te tuakiri kua manatokona. Hei tauira, kāore koe i te hiahia ki tētahi tuakiri kua manatokona hei tono i tētahi uruwhenua o Aotearoa, i tētahi kōkota o Aotearoa rānei ki Immigration New Zealand.
Ngā wāhi e taea ana te whakamahi i te tuakiri kua manatokona e RealMe
Me pēhea te tono
Hei tono i tētahi tuakiri kua manatokona e RealMe, me whai takiurunga RealMe koe. Mēnā kāore anō koe kia whai i tētahi, ka taea te waihanga i tētahi i mua i tō tīmata ake.
Waihangatia he takiurunga RealMe
1. Kōrero mai ko wai koe
Ka tāuru koe i ngā taipitopito mai i tētahi o ēnei e whai ake nei:
- He uruwhenua o Aotearoa (e pai ana te whakamahi i tētahi uruwhenua kua mōnehu)
- He tiwhikete whānautanga o Aotearoa
- He tiwhikete kirirarautanga o Aotearoa
- He mauhanga hekenga o Aotearoa.
2. Hopungia he whakaahua
He wāhi waiwai ki tō whakaahua hei hāpono ko tō tuakiri ko te tangata e meatia ana e koe.
Ka taea te whakaoti i te hihira tuakiri tuihono mā tō pūrere, ka taea rānei te hopunga o tō whakaahua i tētahi toa hoa patui o RealMe.
He tīwhiri āwhina mō te hopu tuihono i tāu whakaahua
Kimihia he toa hoa patui o RealMe
3. Tukua mai tētahi kaitaunaki tuakiri, ki te hiahiatia
Tērā pea me tuku mai koe i tētahi kaitaunaki tuakiri e taea ana te whakaū ko tō tuakiri ko te tangata e meatia ana e koe.
Me mātua pēnei te kaitaunaki:
- kia 16 ōna tau, neke atu rānei
- kua neke atu i te 1 tau tana mōhio ki a koe
- kei a ia tētahi uruwhenua o Aotearoa e whai mana ana, kua mōnehu rānei
- me whakaae kia noho hei kaitaunaki mōu (ka whakapā atu pea mātou ki a ia)
- kia wātea mai ia mēnā ka waea atu mātou ki a ia, ka īmēra rānei, hei hāpono i ngā taipitopito mō tō tono – mā konei e āraihia ngā takaroa.
Me kaua e pēnei te kaitaunaki:
- he wāhanga o tō whānau tata, o tō whānau whānui rānei (i roto nei ko ngā kaihana, ko ngā hungarei, ko ngā hoa rangatira o mua hoki)
- e noho ana i tō wāhi noho.
Me tuku mai koe i tā te kaitaunaki:
- tau uruwhenua hou rawa atu
- roanga o te ingoa
- nama waea
- rā whānau
- wāhi noho i te kāinga
- wāhitau īmēra.
4. Tukuna tō tono
Ka tukuna atu e mātou he īmēra ki a koe hei whakaū i ngā mahi ka whai ake nei, tae atu ki tētahi rārangi tuhinga hei kawe mai mēnā me toro atu koe ki tētahi toa hoa patui o RealMe.
Mā mātou koe e whakapā ki te hiahiatia ētahi atu pārongo. Tirohia tā mātou Whārangi Āwhina e kitea ai ngā wā tukatuka tino hou.
Ngā kaitono 13 ngā tau, iti iho hoki
Mēnā 13 ō tau, iti iho rānei, e kore pea koe e hiahia ki te tuakiri kua manatokona. Ko te nuinga o ngā ratonga ka taea e koe te uru atu i tēnei pakeke, kāore e hiahiatia kia whai koe i tāu ake pūkete RealMe.
Ki te kore te ratonga e hiahia ki tētahi tuakiri kua manatokona, i te nuinga o ngā horopaki me tono tētahi matua, tētahi kaitiaki ā-ture rānei mōu me te whakamahi i tāna ake pūkete RealMe.
Mēnā kei te hiahia tonu koe ki te tono, me mātua whakaae mai tō mātua, tō kaitiaki ā-ture rānei. I muri i tō whakaoti i te wāhanga tuihono o tō tono, tāngia te puka whakaaetanga me te tono i tō matua, i tō kaitiaki ā-ture rānei kia whakakīia.
Ina toro atu koe ki tētahi toa hoa patui o RealMe kia hopungia tō whakaahua, kawea mai te puka whakaae kua whakaotingia me ērā atu tuhinga kua tonoa koe ki te kawe mai (tērā pea ka whakarārangihia ēnei i te puka whakaaetanga, ki te īmēra hoki ka tukuna atu e mātou i muri i tō tono).
Whakapuakitanga whakaae mō tētahi tono tuakiri kua manatokona e RealMe [PDF 129KB]