Kupu whakataki

Nau mai ki RealMe. E whakaratoa ana te ratonga RealMe e Te Tari Taiwhenua (DIA) (mātou, tā mātou, ā mātou). Mā te ratonga RealMe e āhei ai ngā tāngata ki te hāpono i ō rātou tuakiri, kia ngāwari ake ai te uru ki ngā ratonga a ngā kaiwhakarato ratonga tuihono. Mā te ratonga RealMe e āhei ai hoki ngā tāngata ki te tiri i ngā pārongo kua manatokona (pērā i te wāhi noho) e puritia ana e ngā kaiwhakarato pārongo kiritoru.

E whakatakotoria ana e ēnei ture whakamahi ā mātou takohanga ki ngā tāngata e whakamahi ana i te ratonga (koe, tō, te kaiwhakamahi). E whakatakotoria ana hoki ā mātou here ki a koe ina whakamahi ana koe i te ratonga. E ākina ana ā mātou here e te hiahia ki te pare i a koe e noho haumaru tonu ai koe, e noho whita tonu ai koe ina whakamahi ana koe i te ratonga RealMe.

Ka tonoa koe ki te whakaae ki ēnei ture whakamahi ina rēhita ana koe ki te whakamahi i te ratonga RealMe. Ka pēnei ina waihanga koe i tētahi takiurunga RealMe kia uru ki ngā ratonga tuihono.

Me pānui ēnei ture e koe, me mārama hoki ki a koe. Ki te kōwhiri koe ki te rēhita, ki te whakamahi rānei i tētahi ratonga RealMe, kua tū ēnei ture whakamahi hei whakaaetanga i waenganui i a tātou mō te whakamahinga o te ratonga RealMe.

Mēnā e hiahia ana koe ki te tono me te whakamahi i tētahi tuakiri kua manatokona, i tētahi wāhi noho kua manatokona e New Zealand Post Limited rānei (NZ Post), i tētahi atu ratonga pārongo kiritoru rānei, me mātua whakaae hoki koe ki ētahi ture motuhake hei wāhanga o ā rātou tukanga tono. Ka whakaaturia aua ture motuhake ki a koe i roto i ērā tukanga tono. Ka kitea hoki ērā i tēnei paetukutuku mēnā e hiahia ana koe ki te tiro atu ki ērā i mua.

E anganui ana, e kōrero ana rānei ēnei ture whakamahi o RealMe i ngā take e whai ake nei: 

  • te whakamahinga o te ratonga RealMe
  • ō mātou takohanga ki a koe
  • ō takohanga ki a mātou
  • ngā tikanga e tūtohungia ana
  • te pānga o tō whakamahi i tō takiurunga
  • ngā mahi pare
  • te urunga, te whakamahinga rānei he mea takahi ture
  • te tūmataiti
  • ngā tautohe
  • ngā whakaritenga whakaehu
  • ngā panonitanga ki ngā ture whakamahi me te tauākī tūmataiti.

Te whakamahinga o te ratonga RealMe

E pai ana kia whiwhi ngā tāngata katoa i tētahi takiurunga ki te whakamahi i te ratonga takiuru a RealMe. Mēnā rānei e taea ana e koe te whakamahi i tō takiurunga ki tētahi kaiwhakarato ratonga, e hāngai ana ki te pāhekoheko, kāore rānei, o taua ratonga ki te ratonga RealMe, ā, mēnā rānei kua whakaaetia koe e ia kia uru ki ana ratonga.

E whakaaetia anake tō whakamahi i te ratonga takiuru a RealMe ki tāu ake takiurunga, ā, me kaua koe e tiri i tō takiurunga ki ētahi atu.

Ō mātou takohanga ki a koe

Ka whakatinana mātou i te āta whakaaro, i ngā pūkenga hoki e tika ana

Ka whakatinana mātou i te āta whakaaro, i ngā pūkenga hoki e tika ana hei:

  • whakarato i te ratonga RealMe;
  • whakarite kia noho haumaru tonu ngā pārongo kaiwhakamahi i te tomonga kāore i whakamanatia;
  • whakarite e tika ana te tau o ā mātou ratonga ki ngā take i whakaahuaria i tēnei pae tukutuku; ā,
  • whakarite kua whakahoungia ngā pārongo i tēnei pae tukutuku, ā, e tika ana hoki.

Ahakoa e whakaae ana mātou ka taunaha pea mātou ki ētahi ngaronga tōtika, whakakino rānei ka pā ki a koe mā tā mātou korenga e whakatinana i te āta whakaaro, i ngā pūkenga hoki e tika ana i kōrerotia i runga ake nei, atu i ngā ture i tukua mai e te ture tē taea te awere, kāore mātou e taunaha ana ahakoa te take (tae atu ki te tūpato kore) i te ngaronga kāore i te tōtika, i te ngaronga putanga rānei, mō te ngaronga o te monihua, o te ara wātea, o te moni whiwhi, o ngā moni penapena rānei ka pā ki a koe e hāngai ana ki tō whakamahinga i te ratonga RealMe.

Mā mātou koe e āwhina

Mā mātou koe e āwhina i roto i tō whakamahi i te ratonga RealMe. Whakaratoa ai e mātou tētahi Taupaepae Āwhina RealMe , i ētahi taputapu tuihono hoki ki te pēnei. I ētahi wā whakahaeretia ai e tētahi kaiwhakarato ratonga e whai wāhi mai ana tētahi taupaepae āwhina e whakarato ana i te tautoko takiurunga RealMe mā āna ake kiritaki.

Ka uru pea ngā kaimahi a te Taupaepae Āwhina RealMe ki ō pārongo takiurunga RealMe hei āwhina i a koe. Tērā pea ka tonoa hoki e rātou tō ingoa kaiwhakamahi me ngā whakautu ki ō pātai haumarutanga hei āwhina i a koe. Ki te kore e tukua aua momo pārongo ki ngā kaimahi a te ratonga RealMe, e kore pea e taea e rātou koe e āwhina. Heoi, kia mōhio mai koe, ka kore rawa ngā kaimahi a te Taupaepae Āwhina RealMe e tono i tō kupuhipa, i tō PIN rānei i a koe, ā, me kaua koe e tuku i aua pārongo ki a rātou.

Whakaratoa ai pea e ngā kaiwhakarato pārongo kiritoru ā rātou ake ratonga tautoko motuhake e pā ana ki ā rātou ratonga pārongo. Hei tauira, ka whakarato pea a NZ Post i tōna ake ratonga taupaepae āwhina e pā ana ki tana ratonga manatoko wāhi noho. Pērā i ngā ratonga taupaepae āwhina ratonga, kāore mātou i te noho haepapa ki aua ratonga kiritoru. Me whakapā atu koe ki ngā kaiwhakarato pārongo, ratonga rānei e hāngai ana mō aua ratonga.

Ō takohanga ki a mātou

Ko te take o ō takohanga ki a mātou, kua whakatakotoria ki raro nei, ko te pare i te pono me te haumarutanga o te ratonga RealMe, i ngā kaiwhakamahi o te ratonga RealMe, i ērā atu tāngata hoki. Me mārama ki a koe, ki te kore koe e whakamana i ō takohanga, ka āhei pea ngā kiritoru ki te kawe i ngā mahi ko te āhua nei e kawea ana mōu, ka puta pea te ngaronga ki a koe, ki ētahi atu tāngata rānei, ā, ka ngana pea ērā atu tāngata ki te whakarite kia noho haepapa ko koe.

Te whakamahinga o RealMe hei takiuru

He mea whai tikanga, muna hoki tō takiurunga e motuhēhē ai i tō tuakiri tuihono ki ngā kaiwhakarato ratonga e whai wāhi mai ana. Nō reira, me āta tiaki koe i tō takiurunga, i tō PIN rānei kua waihangatia pea e koe, tae atu ki ngā pātai haumarutanga ka kōwhiria e koe ina waihanga ana koe i tētahi takiurunga, me te tiaki i ēnā kia whita.

E whakaae ana koe ka pēnei koe:

  • kāore koe e whakamahi, e whakamātau rānei ki te whakamahi, i runga i te mōhio, i runga rānei i te pokerenoa, i tētahi ratonga, i tētahi takiurunga, i tētahi pūrere pūmārō a RealMe, i tētahi waehere RealMe kotahi tōna whakamahinga mō tētahi take kāore i takunetia, tae atu ki te take takahi ture ahakoa he aha taua take; ā,
  • me whakamōhio wawe koe i te Taupaepae Āwhina RealMe ki te mōhio koe, ki te whai take rānei koe ki te whakapono kua tū mai, ka tū wawe mai rānei te whakamahinga tinihanga, te whakamahinga takahi ture atu anō o tō takiurunga RealMe, o tō pūrere pūmāro, o tō waehere rānei.

Te pare i ngā takiurunga, i ngā pātai haumarutanga, i te PIN hoki

Me huri wawe koe i tō kupuhipa, i ō pātai haumarutanga, i tō PIN rānei, ā, me whakamōhio atu ki te Taupaepae Āwhina RealMe mēnā:

  • e whakapono ana koe kua whakararuatia te haumarutanga o tō kupuhipa, o ngā pātai haumarutanga i whakautua e koe, o te PIN rānei i waihangatia e koe; tērā rānei,
  • kua mārama ki a koe te whakamahinga kāore i whakamanatia o tō ingoa kaiwhakamahi, o tō kupuhipa rānei.

Ngā pūrere pūmārō

Ki te tuku mātou i tētahi pūrere pūmārō ki a koe (pērā i tētahi taonga waehere) hei whakaputa i ngā waehere RealMe kotahi te whakamahinga te take, e whakamahia ai hei wāhanga o tō takiurunga:

  • ka noho tonu te pūrere hei rawa nō DIA;
  • me tiaki tika koe i te pūrere, ā, me whakarite kia noho haumaru i te urunga atu a tētahi atu;
  • me kaua koe e tuku i tētahi atu tangata ki te whakamahi i tō pūrere; ā,
  • ki te ngaro i a koe, ki te tūkino rānei koe i te pūrere, ki te tāhaetia rānei, me whakamōhio wawe atu koe ki te Taupaepae Āwhina RealMe.

Ki te whakarato koe i tāu ake pūrere pūmārō (pērā i te waea pūkoro) hei whakaputa i ngā waehere RealMe te take, e whakamahia ai hei wāhanga o tō takiurunga:

  • me mātua whakarite e koe kia noho haumaru i te urunga atu a tētahi atu ngā waehere RealMe o nāianei i tukua ki te pūrere pūmārō;
  • me kaua koe e tuku i tētahi atu tangata ki te whakamahi i tō pūrere hei whiwhi i ngā waehere RealMe te take; ā,
  • ki te ngaro i a koe, ki te tūkino rānei koe i te pūrere, ki te tāhaetia rānei, me whakamōhio wawe atu koe ki te Taupaepae Āwhina RealMe kia pai ai tā mātou whakakore i te rehitatanga o te pūrere pūmāro, tā mātou mono rānei i te pūrere pūmārō i te ratonga takiurunga RealMe.

Ngā tikanga e tūtohungia ana

Me pēnei koe:

  • me kaua e whakamahi i tētahi wāhitau īmēra ngātahi (nā te mea ka tukuna ki tēnei wāhitau īmēra tō ingoa kaiwhakamahi, tō kupuhipa taupua, ētahi atu pārongo rānei ina tono tautoko koe mō tō takiurunga, hei tauira, ina wareware i a koe tō ingoa kaiwhakamahi, tō kupuhipa rānei);
  • me kōwhiri tētahi kupuhipa, tētahi PIN rānei he mea muna ko koe anake te mea mōhio, ā, tē taea e tētahi atu te kimikimi noa;
  • me kaua e whāki i tō kupuhipa ki tētahi atu, tae atu ki ngā kaimahi a ngā ratonga RealMe (kia mōhio mai koe, e kore rawa ngā kaimahi a ngā ratonga RealMe e tono i tō kupuhipa, i tō PIN rānei i a koe);
  • me tiaki tō kupuhipa me tō PIN kia kore ai e kitea e ētahi atu mēnā ka tuhi koe i tō kupuhipa, i tō PIN rānei, mēnā rānei ka rokiroki ā-hikotia (ehara ngā kōnae kāore i whakamunatia i tētahi rorohiko, i ngā tuhipoka rānei i tō aroturuki i ngā kōwhiringa haumaru);
  • me tūpato ina whakautu ana koe i ō pātai haumarutanga kia pai ai tō maumahara ki ngā whakautu ā muri ake;
  • me kaua e whāki ki tētahi tangata ō whakautu ki ngā pātai haumarutanga, i tua atu i ngā kaimahi a ngā ratonga RealMe ina hiahia rātou ki aua whakautu hei āwhina i a koe;
  • me kaua e tuku i tētahi tangata kia kite i tō kupuhipa, i ō whakautu ki ngā pātai haumarutanga, i tō PIN rānei, me kaua hoki e tuku ki tētahi te ara wātea ki te kite atu, ki te hopu rānei i ēnā;
  • me kaua e tango herenga whakahaere (jailbreak, root rānei) i tō waea pūkoro nā te mea e whakaaheingia ai pea te tūhuratanga o te pārongo kua noho haumaru kē ki te kore koe i pērā;
  • me kaua e whakamahi i tētahi taupānga atu i te Google Authenticator hei whakaputa i ngā waehere RealMe nā te mea kāore anō kia whakamātauhia mō te hototahi, mō te haumarutanga rānei; ā,
  • me whakahou tonu koe i ō taipitopito whakapā i RealMe.

Ka taea te ako anō mō ngā take haumarutanga tuihono mā te toro atu ki te pae tukutuku a NetSafe.

Te pānga o tō whakamahi i tō takiurunga

Mā te whakaae ki ēnei ture whakamahi, e meatia ana kua mārama ki a koe, kua whakaaetia hoki e koe, kei a mātou te tika ki te whirinaki ki:

  • te tūturutanga o tō ingoa kaiwhakamahi me tō kupuhipa, ā, ina hāngai ana ki ngā waehere RealMe;
  • tō whakaaetanga ki te tiri i tō tuakiri kua manatokona, i tō wāhi noho kua manatokona e NZ Post, i tētahi atu pārongo rānei kua tukuna e tētahi atu kiritoru hei uru atu ki te ratonga tuihono a te kaiwhakarato e whai wāhi mai ana mā te ratonga RealMe ; ā,
  • te tūturutanga o tō ingoa kaiwhakamahi hei tuku i ngā tohutohu ki te Taupaepae Āwhina RealMe mōu.

Ina tāurutia te ingoa kaiwhakamahi me te kupuhipa tika, e pai ana tā mātou, tā te ratonga RealMe hoki tū ki te mahi i runga i ngā tohutohu horekau te uiui atu anō.

Te whakaaetanga pūmau tonu

E pai ana tō whakaae kia maumahara a RealMe ki tō whakaaetanga ki te tiri i tō tuakiri kua manatokona; i tō wāhi noho kua manatokona e NZ Post, i tētahi atu pārongo rānei ki tētahi kaiwhakarato ratonga e whai wāhi mai ana. Ka mōnehu tō whakaaetanga i te rā i tuhia, ina huri ngā pārongo, ki te whakakore rānei koe i tō whakaaetanga.

Ngā mahi pare

Hei pare i ngā kaiwhakamahi, i ērā atu tāngata, i te ratonga RealMe, i te ratonga manatoko tuakiri, i te ratonga manatoko wāhi noho a NZ Post rānei, i ērā atu ratonga pārongo e whakaratoa ana e te kiritoru rānei, e pai ana tā mātou whakatārewa, mono rānei i tō takiurunga me te kore pānui atu ki a koe mehemea ki ō mātou whakaaro e pēnei ana:

  • he mea waiwai te whakatārewa, te mono rānei i tō takiurunga hei whakaū i te tikitū, i te haumarutanga rānei o te pae tukutuku nei, o te ratonga a RealMe, a DIA, a NZ Post, a tētahi atu ratonga kaiwhakarato pārongo rānei, i te ratonga rānei a tētahi kaiwhakarato ratonga, i tētahi tangata rānei; tērā rānei,
  • e whakamahia hētia ana te takiurunga, kua whakararutia kētia rānei; tērā rānei,
  • ka takahi koe i ēnei ture whakamahi.

Ina tika ana, mā mātou koe e whakamōhio mō te whakatārewa, mō te mono rānei i tō takiurunga i te wā tino tata e taea ana i muri i te pēnei.

Te urunga, te whakamahinga rānei he mea takahi ture

Mēnā ka uru koe, ka whakamahi koe, ka ngana rānei koe ki te uru atu, i runga i te mōhio, ki tētahi ratonga kaiwhakarato pārongo a RealMe, ki tētahi ratonga kaiwhakarato pārongo e hāngai ana a DIA, a tētahi kiritoru rānei, mō te take takahi ture (tae atu ki te hara tāware, ki te whakamātau ki te hara tāware, ki te mūrere, ki te whakamātau ki te mūrere rānei, engari kāore i te whakawhāitihia ki ēnei), e whakaae nei koe ka taunaha koe ki te utu i ngā kiri katoa (i a DIA, i te kaiwhakarato pārongo e hāngai ana mōna), te nui o te ngaronga i pūtakea mai, ahakoa tōtika, ahakoa kāore i te tōtika rānei, ki taua kiri i runga i āu mahi takahi ture (ka tohua ngā ngaronga kiritoru hei tō mātou ngaronga). Hei karo i te rangirua, kāore i te takunetia e tēnei whiti te tuku i ētahi painga e taea ana e ngā kiritoru te uruhi i raro i te Contract and Commercial Law Act 2017, Wāhanga 2, Wāhanga Āpiti 1. Ka taunaha hoki pea koe kia hāmenetia ki ngā hara taihara.

Te tūmataiti

E hāngai ana te Tauākī tūmataiti RealMe mō te ratonga RealMe ki ō pārongo whaiaro. Mā te rēhita ki te ratonga RealMe, me te whakaae ki ēnei ture whakamahi, e tohua ai kua pānuitia, kua whakaaetia hoki e koe ngā ture o taua tauākī tūmataiti. Nā reira, me mātua whakarite e koe kua pānuitia e koe, ā, e pai ana ki a koe, i mua i te whakaae ki ēnei ture whakamahi.

Ngā tautohe

Mēnā he tautohe tāu ki a mātou e pā ana ki ēnei ture whakamahi, ki tētahi ratonga RealMe rānei, me mātua whakapā tuatahi atu koe ki te Taupaepae Āwhina RealMe. Whakapau kaha ai kōrua ko te Taupaepae Āwhina RealMe ki tērā ka taea i runga i te ngākau pono ki te whakatau i te tautohe. Ki te kore e taea e kōrua ko te Taupaepae Āwhina RealMe te whakatau i te tautohe e ea ai koe, e pai ana tō tono i te Taupaepae Āwhina RealMe ki te whakapiki i te tautohe ki te māngai a DIA e tika ana.

Kātahi ka whakapā wawe atu mātou ki a koe, ā, ka ngana ki te whakatau tahi ki a koe i te tautohe. Mēnā, whai muri i te whakapikinga pērā, kāore anō te tautohe kia tau e ea ai koe, ka taea e koe te kawe i ngā mahi ā-ture e tika ana ki ō whakaaro, pērā i te tuku amuamu ki te Kaitiaki Mana Tangata, te tīmata rānei i ngā whakawātanga ā-ture.

Ko ngā tautohe e hāngai ana ki tētahi ratonga a te kaiwhakarato pārongo kiritoru me tuku ki te ratonga kaiwhakarato pārongo e hāngai ana.

Ngā whakaritenga whakaehu

Te manakore, te kahakore rānei

Mēnā ko tētahi, ko ētahi rānei o ēnei ture whakamahi, ko te whakahāngaitanga o ēnei ki tētahi tangata, ki ētahi horopaki rānei e whakawātia ai, ahakoa te whānui, he mea manakore, he mea kahakore rānei:

  • kāore te toenga o ēnei ture whakamahi, te whakahāngaitanga rānei o aua ture whakamahi ki tētahi atu tangata, ki ētahi atu horopaki rānei, e pāngia;
  • ka noho mana tonu, ka noho tonu hoki hei mea uruhi, ia ture, ki te whānuitanga e whakaaetia ana e te ture; ā,
  • ka tohua te ture manakore, kahakore rānei kia panonitia hei whakaatu, ki te tata e taea ana, i te takune tūturu (e ai ki te whakatauranga mai i tēnei pae tukutuku).

Protection of Personal and Property Rights Act 1988

I raro i te Protection of Personal and Property Rights Act 1988 ka taea e te kōti te kopou i tētahi kaiwhakarite, i tētahi kaitiaki oranga, i tētahi kaiwhakahaere rānei e hāngai ana ki ētahi tāngata, ki ō rātou rawa, ki ā rātou whakaritenga rānei. Ki te whakaaetia e tēnei Ture, e tētahi ōta rānei i tukua i raro i tēnei Ture, kia whakamahia tētahi takiurunga, tētahi pūrere pūmārō rānei e rerekē ana i ēnei ture whakamahi, me mātua whakamahi anake te kaiwhakarite, te kaitiaki, te kaiwhakahaere rānei i te takiurunga, i te pūrere pūmārō rānei ki te whānuitanga e whakaaetia ana i raro i taua Ture, ōta rānei. Me kaua te kaiwhakarite, te kaitiaki, te kaiwhakahaere rānei e whakamahi i te tuakiri kua manatokona o tētahi atu tangata.

Minors' Contracts Act 1969

Mēnā, i raro i te Wāhanga 2, Wāhanga Āpiti 6 o te Contract and Commercial Law Act 2017, ka whakawāngia ko tētahi, ko ētahi rānei o ēnei ture whakamahi kāore i te tōkeke, i te whaitake hoki, ka tohua taua ture, taua here rānei kua panonitia e pā ana ki te kaiwhakamahi e hāngai ana hei whakaatu i te takune tūturu (e ai ki te whakatauranga mai i tēnei pae tukutuku), ki te tata e taea ana, engari kia tōkeke, kia whaitake hoki, ā, i ngā horopaki katoa, e ai ki ngā ture e hāngai ana.

Ngā panonitanga ki ngā ture whakamahi, ki te tauākī tūmataiti hoki

E pai ana tā mātou whakahou i ēnei ture whakamahi, i te tauākī tūmataiti hoki, ahakoa āhea, ā, ki te kore te panonitanga kōhukihuki e hiahiatia ana, ka ngana ai mātou ki te whakairi i tētahi pānui ki tēnei pae tukutuku e whakarāpopoto ana i ngā panonitanga i te kotahi marama i te itinga iho i mua i te whakatinanatanga o ngā panonitanga. Kei te hiku o tēnei pae tukutuku tētahi hono (arā, i te taha whakararo o te mata) e kīia nei ko te "Rārangi o ngā huringa". Ka taea e koe te pāwhiri i taua hono i ngā wā katoa hei arotake i tētahi whakarāpopoto o ngā panonitanga kua whakamahia e mātou ki ngā ture whakamahi, ki te tauākī tūmataiti hoki. Mā tō whakamahi tonu i te ratonga RealMe i muri i te rā whakatinana o ngā panonitanga ka whakamahia e mātou ki ngā ture whakamahi, ki te tauākī tūmataiti hoki, mā roto i tō tāuru i tō takiurunga, e tohua ai tō whakaae ki aua panonitanga.

Rārangi o ngā huringa